மறுஉருவாக்க ஈரல் தொழில்நுட்பத்தைப் பயன்படுத்தி வட அமெரிக்காவின் முதல் உறுப்பு மாற்று அறுவை சிகிச்சையைப் பெற்ற கியூபெக் நபர்
கல்லீரல் நோய் மற்றும் புற்றுநோயுடன் 15 ஆண்டுகள் போராடி வந்த கியூபெக் மாநிலத்தைச் சேர்ந்த 64 வயதான ஜெரார்ட் லேண்ட்ரி (Gérard Landry), மறுஉருவாக்கம் செய்யப்பட்ட கல்லீரல் தொழில்நுட்பத்தைப் பயன்படுத்தி வட அமெரிக்காவிலேயே முதன்முறையாக உறுப்பு மாற்று அறுவை சிகிச்சை பெற்ற நோயாளி என்ற பெருமையைப் பெற்றுள்ளார்.
மாண்ட்ரீலில் உள்ள 'CHUM' மருத்துவமனையில் 'லிவர் அசிஸ்ட்' (Liver Assist) என்ற அதிநவீனக் கருவியைப் பயன்படுத்தி இந்த அறுவை சிகிச்சை செய்யப்பட்டது. இக்கருவி, தானமாகப் பெறப்பட்ட கல்லீரலை உடலுக்கு வெளியே வைத்து, ஆக்ஸிஜன் நிறைந்த திரவத்தைச் செலுத்தி ஆக்ஸிஜன் பற்றாக்குறையால் ஏற்பட்ட திசு சேதங்களைச் சரிசெய்கிறது. பின்னர், இரத்தத்தை அடிப்படையாகக் கொண்ட கரைசலைக் கொண்டு அக்கல்லீரல் சரியாக இயங்குகிறதா என்பதை உறுப்பு மாற்றத்திற்கு முன்பே பரிசோதிக்கிறது.
இதுவரை பயன்படுத்துவதற்கு ஆபத்தானது அல்லது சேதமடைந்தது எனக் கருதப்பட்டு நிராகரிக்கப்பட்ட கல்லீரல்களை இத்தொழில்நுட்பம் மூலம் சரிசெய்ய முடியும். இதன்மூலம் முதலாண்டிலேயே சுமார் 20 முதல் 24 கூடுதல் கல்லீரல்களை உறுப்பு மாற்று சிகிச்சைக்குப் பயன்படுத்த முடியும் என மருத்துவர்கள் கணித்துள்ளனர்.
அறுவை சிகிச்சைக்குப் பிறகு லேண்ட்ரியின் இரத்தப் பரிசோதனை முடிவுகள் எதிர்பார்த்ததை விட மிக விரைவாக முன்னேற்றம் அடைந்துள்ளன. அவர் சீராகக் குணமடைந்து வருவதால் விரைவில் காஸ்பேசியாவில் உள்ள தனது வீட்டிற்குத் திரும்புவார் என எதிர்பார்க்கப்படுகிறது.
