டிரம்ப்பின் உதவியாளர் நடாலி ஹார்ப் பற்றி அனைவரும் பேசுவது ஏன்?
ஜார்ஜியா மாநில ஜனநாயகக் கட்சி செனட்டர் ஜான் ஓசாஃப் பிரச்சார நிகழ்வு ஒன்றில் பேசிய கருத்துகள் இணையத்தில் வைரலானதைத் தொடர்ந்து, அமெரிக்க அதிபர் டொனால்ட் டிரம்ப்பின் 35 வயதான சிறப்பு உதவியாளர் நடாலி ஹார்ப் (Natalie Harp) ஊடகங்களின் கவனத்தை ஈர்த்துள்ளார் என CBC News செய்தி வெளியிட்டுள்ளது.
செனட்டர் ஜான் ஓசாஃப் பிரச்சாரக் கூட்டத்தில் டிரம்பை விமர்சித்துப் பேசும்போது, அதிபர் "தனது நடன அரங்கை (ballroom) கட்டவும், கத்தார் அமீரால் பரிசளிக்கப்பட்டதாகக் கூறப்படும் பாதுகாப்பற்ற பறக்கும் அரண்மனையில் (Air Force One) நடாலியுடன் பயணம் செய்யவுமே விரும்புகிறார்" எனக் கூறினார். இந்த அறிக்கை இணையத்தில் வைரலாகி, அவர்களது பணி சார்ந்த நெருக்கமான உறவு குறித்துப் பல்வேறு விவாதங்களைக் கிளப்பியது.
வெள்ளை மாளிகையின் செய்தித் தொடர்பாளர் ஸ்டீவன் சியூங் (Steven Cheung), ஓசாஃபின் கருத்துகளைக் கடுமையாக மறுத்தார். மேலும், புற்றுநோயிலிருந்து மீண்டு வந்த நடாலி ஹார்ப்பின் தனிப்பட்ட பின்னணியைக் கருத்தில் கொள்ளாமல் ஓசாஃப் பேசியது பாலின பாகுபாடு மற்றும் இரக்கமற்ற செயலாகும் என பழமைவாத விமர்சகர்கள் குற்றம் சாட்டினர்.
2019-ஆம் ஆண்டில் எலும்புப் புற்றுநோயால் பாதிக்கப்பட்டிருந்த நடாலி ஹார்ப், டிரம்ப் அறிமுகப்படுத்திய "ரைட் டூ ட்ரை" (Right to Try) சட்டத்தைப் பாராட்டிப் பேசியதன் மூலம் முதன்முதலில் மக்களின் கவனத்தைப் பெற்றார். 2022-ஆம் ஆண்டில் டிரம்பின் முதன்மை அணியில் இணைந்த அவர், நீதிமன்ற விசாரணைகள், பிரச்சார நிகழ்வுகள் மற்றும் அதிகாரப்பூர்வப் பயணங்களின் போது டிரம்ப்பிற்கு உடனுக்குடன் செய்தித் துணுக்குகளை அச்சிட்டுக் கொடுக்கும் கையடக்க அச்சுப்பொறியுடன் (mobile printer) எப்போதும் அவருடனே பயணிக்கும் தீவிர உதவியாளராகச் செயல்பட்டு வருகிறார்.
