அமெரிக்காவுக்கு பதிலடி: டாலருக்கு டாலர் அளவில் வரி விதிக்க கனடா உறுதி
அமெரிக்காவுடன் புதிய வர்த்தக ஒப்பந்தத்தை எட்டுவதற்கான கடைசி முயற்சியும் தோல்வியடைந்ததைத் தொடர்ந்து, கனடா பிரதமர் மார்க் கார்னி அமெரிக்காவுடனான வர்த்தக பேச்சுவார்த்தைகளை இடைநிறுத்தியுள்ளார்.
வெள்ளிக்கிழமை நள்ளிரவு விதிக்கப்பட்ட காலக்கெடுவுக்குள் புதிய ஒப்பந்தம் ஒன்றை எட்ட முடியாததால், கனடா ஏற்றுமதிகளுக்கு அமெரிக்கா விதித்துள்ள புதிய 50 சதவீத சுங்க வரிகள் சனிக்கிழமை அதிகாலை 12:01 மணி முதல் அமலுக்கு வந்தன.
இதையடுத்து, அமெரிக்காவின் நடவடிக்கைக்கு சம அளவில் பதிலடி சுங்க வரிகளை கனடாவும் விதிக்கும் என பிரதமர் மார்க் கார்னி உறுதியளித்துள்ளார்.
மேலும், அமெரிக்காவுடனான பேச்சுவார்த்தையில் ஈடுபட்டிருந்த கனடாவின் வர்த்தக பேச்சுவார்த்தையாளர்களை உடனடியாக ஒட்டாவாவுக்கு திரும்புமாறு கார்னி உத்தரவிட்டுள்ளார்.
இந்த நடவடிக்கை இரு நாடுகளுக்கும் இடையிலான வர்த்தக உறவில் புதிய பதற்றத்தை ஏற்படுத்தியுள்ளது. அமெரிக்காவின் புதிய 50% வரிகள் கனடாவின் பல பில்லியன் டாலர் மதிப்பிலான ஏற்றுமதிகளை பாதிக்கும் என எதிர்பார்க்கப்படுகிறது.
கனடாவின் பதிலடி நடவடிக்கைகள் அமெரிக்க ஏற்றுமதிகளையும் பாதிக்கக்கூடும் என்பதால், வட அமெரிக்காவின் மிகப்பெரிய வர்த்தக உறவுகளில் ஒன்றான கனடா–அமெரிக்கா வர்த்தகத்தில் மோதல் மேலும் தீவிரமடையும் சூழல் உருவாகியுள்ளது.
