அதிக அழிவை ஏற்படுத்தக்கூடிய 2,000 பவுண்டு குண்டுகளை இஸ்ரேலுக்கு விற்கும் அமெரிக்கா
அதிக அழிவை ஏற்படுத்தக்கூடிய 2,000 பவுண்டு எடையுள்ள குண்டுகளை இஸ்ரேலுக்கு விற்க ட்ரம்ப் நிர்வாகம் திட்டமிட்டுள்ளது.
அமெரிக்க ஜனாதிபதி டொனால்ட் ட்ரம்பின் நிர்வாகம், பல்லாயிரக்கணக்கான, அதிக அழிவை ஏற்படுத்தக்கூடிய 2,000 பவுண்டு எடை கொண்ட குண்டுகள் உட்பட 2.8 பில்லியன் டொலர் மதிப்பிலான ஆயுதத் தொகுப்பை இஸ்ரேலுக்கு விற்கத் திட்டமிட்டுள்ளது.
முக்கிய ஆயுத விற்பனைகளை மறுஆய்வு செய்யும் தொடர்புடைய நாடாளுமன்றக் குழுக்களுக்கு முறைசாரா முறையில் தெரிவிக்கப்பட்டுள்ள இந்தத் திட்டமிடப்பட்ட தொகுப்பில், 20,000 எம்.கே-84 குண்டுகளும் 20,000 பி.எல்.யூ-117 குண்டுகளும் அடங்கும் என தகவல் கசிந்துள்ளது.
2023-இல் காஸா போர் தொடங்கியதிலிருந்து, இஸ்ரேலுக்கான அமெரிக்கப் பொதுமக்களின் ஆதரவு, குறிப்பாக ஜனநாயகக் கட்சியினரிடையே பெருமளவில் சரிந்துள்ளது.
ஜூன் மாதத்தில் நடத்தப்பட்ட குவின்னிபியாக் பல்கலைக்கழகக் கருத்துக்கணிப்பு ஒன்றின்படி, அமெரிக்கா இஸ்ரேலுக்கு அளவுக்கு அதிகமாக ஆதரவளிப்பதாக 48 சதவீத பேர்களும் 66 சதவீத ஜனநாயகக் கட்சியினரும் கருதுகின்றனர்; 2017-இல் இந்தக் கேள்வி முதன்முதலில் கேட்கப்பட்டபோது இச்சதவீதங்கள் முறையே 16 மற்றும் 20 ஆக மட்டுமே இருந்தன.
காஸா மற்றும் லெபனான் ஆகிய பகுதிகளில் இஸ்ரேல் தொடர்ந்து 2,000 பவுண்டு எடையுள்ள குண்டுகளைப் பயன்படுத்தி வருகிறது; இது மனித உரிமை ஆர்வலர்களின் கடும் எதிர்ப்பையும் கண்டனத்தையும் ஈர்த்துள்ளது.
காஸா சுகாதாரத் துறையினரின் தகவலின்படி, இஸ்ரேலின் இராணுவ நடவடிக்கையில் 73,000-க்கும் மேற்பட்ட பாலஸ்தீனியர்கள் கொல்லப்பட்டுள்ளனர். காஸாவில் இஸ்ரேல் இனப்படுகொலையை நிகழ்த்தியதாக ஐக்கிய நாடுகள் சபையின் விசாரணை ஒன்று கண்டறிந்தது; ஆனால், இந்தக் குற்றச்சாட்டை இஸ்ரேல் மறுக்கிறது.
அக்டோபர் 7, 2023 அன்று ஹமாஸ் தலைமையில் நடத்தப்பட்ட தாக்குதலில் 1,200 பேர் கொல்லப்பட்டு, 250-க்கும் மேற்பட்டோரைப் பணயக்கைதிகளாகப் பிடித்ததைத் தொடர்ந்து, தாங்கள் மேற்கொண்டுள்ள நடவடிக்கைகள் தற்காப்புக்காகவே என்று இஸ்ரேல் கூறுகிறது.
உண்மையில் காஸா போரின் பின்னணி குறித்த தகவல்களை இஸ்ரேலியப் பத்திரிகை ஒன்று சமீபத்தில் அம்பலப்படுத்தியுள்ளது. காஸா விவகாரத்தில் அமெரிக்கா தலையிட்டு ஒரு ஒப்பந்தம் எட்டப்பட்ட சூழலில், இஸ்ரேலின் பார்வை ஈரான் மீது திரும்பியது.
பிப்ரவரி 28 அன்று அமெரிக்காவும் இஸ்ரேலும் ஈரான் மீது தாக்குதல் நடத்தின. இதற்குப் பதிலடியாக, இஸ்ரேல் மற்றும் அமெரிக்க ராணுவத் தளங்கள் அமைந்துள்ள வளைகுடா நாடுகள் மீது ஈரான் தாக்குதல்களை நடத்தியது. தற்போது ஈரான் போரில் இருந்து வெளியேற முடியாமல், அமெரிக்கா திணறி வருவதுடன், கடும் பின்னடைவையும் சந்தித்துள்ளது.
