புதிய ஏவுகணையை வீசிய ஈரான்.. ஹார்முஸில் பின்வாங்கிய அமெரிக்க கடற்படை?
ஈரான் போர் தற்போது ஒரு ராணுவ மோதலாக மட்டுமின்றி, எண்ணெய், கப்பல் போக்குவரத்து, உலக எரிபொருள் விலை மற்றும் மத்திய கிழக்குப் பாதுகாப்பு ஆகியவற்றையும் நேரடியாகப் பாதிக்கும் சர்வதேச நெருக்கடியாக மாறியுள்ளது.
இந்தச் சூழலில் அமெரிக்கா தனது கடற்படை நிலைப்பாட்டை மாற்றியதாக ஈரான் ஆதரவு ஊடகங்கள் வெளியிட்ட தகவல் சர்வதேச கவனத்தை ஈர்த்துள்ளது. ஈரான் ஏவியதாகக் கூறப்படும் ’காஸம் பாசீர்’ (Qasem Basir) கப்பல் எதிர்ப்பு பாலிஸ்டிக் ஏவுகணை தாக்குதலுக்குப் பிறகு, அமெரிக்க போர்க்கப்பல்கள் ஹார்முஸ் நீரிணைக்கு அருகிலிருந்து அரேபியக் கடலுக்குள் நூற்றுக்கணக்கான மைல்கள் பின்வாங்கியதாக அந்த அறிக்கைகள் கூறுகின்றன. எனினும், இந்தக் கூற்றுகள் சுயாதீனமாக முழுமையாக உறுதிப்படுத்தப்படவில்லை.
செப்டம்பர் 5 இரவு, சுமார் 1,200 கி.மீ. தூரம் தாக்கும் திறன் கொண்ட காஸம் பாசீர் ஏவுகணையை ஈரான் ஏவியதாகக் கூறப்படுகிறது. மின்ஒளி மற்றும் வெப்பத் தேடல் (Electro-optical & Thermal Imaging) அமைப்புகளுடன் உருவாக்கப்பட்ட இந்த ஏவுகணை, கடலில் நகரும் போர்க்கப்பல்களை குறிவைக்க வடிவமைக்கப்பட்டதாக கூறப்படுகிறது.
இந்த ஏவுகணை USS George Washington விமானம் தாங்கி கப்பலின் மேல் வெடித்ததாகவும், அதன்பின் அமெரிக்க கடற்படை தனது எல்லைக் கோட்டை ஓமன் வளைகுடா வெளியே இருந்து அரேபியக் கடலுக்குள் மாற்றியதாகவும் ஈரான் கூறுகிறது. மேலும், செப்டம்பர் தொடக்கத்திலிருந்து Sentinel-2 செயற்கைக்கோள் படங்களில் அமெரிக்காவின் முக்கிய போர்க் கப்பல்கள் தென்படவில்லை என்றும் அந்த அறிக்கையில் தெரிவிக்கப்பட்டுள்ளது.
ஈரானின் உச்ச தேசிய பாதுகாப்பு கவுன்சில் பொதுச் செயலாளர் மொஹ்சென் ரெசாயி, ’செப்டம்பர் 12-க்குள் பாரசீக வளைகுடாவில் ஒரு அமெரிக்க போர்க்கப்பலும் இல்லை’ என்று கூறியுள்ளார். தாக்குதலுக்கு முன்பு சுமார் 30 அமெரிக்க கப்பல்கள் இருந்ததாகவும், தற்போது அனைத்தும் குறைந்தது 400 கி.மீ. தூரத்தில் நிறுத்தப்பட்டுள்ளதாகவும் அவர் தெரிவித்துள்ளார். இந்த ஏவுகணை அமெரிக்கர்களுக்கு நரகத்தை உருவாக்கியது; அவர்கள் ஓடிவிட்டனர் என்ற அவரது கருத்து பரபரப்பை ஏற்படுத்தியுள்ளது.
இந்தக் கூற்றுகள் தனித்தனியாக உறுதிப்படுத்தப்படவில்லை. ஈரானின் கூற்றுகளுக்கு மாறாக, அமெரிக்க மத்திய கட்டளை (CENTCOM) முன்னதாக வெளியிட்ட தகவலில், USS George Washington மற்றும் அதனுடன் இருந்த டெஸ்ட்ராயர் பல ஈரான் தாக்குதல்களை வெற்றிகரமாக தவிர்த்ததாக தெரிவித்திருந்தது. ரெசாயியின் புதிய கூற்று, அதே சம்பவத்தையா அல்லது வேறு மோதலையா குறிக்கிறது என்பது தெளிவாக இல்லை.
இதற்கிடையே ஈரானின் பாலிஸ்டிக் ஏவுகணை தாக்குதலுக்குப் பிறகு, அமெரிக்க போர்க்கப்பல்கள் தென்பட்டதாகக் கூறப்பட்ட கடற்பகுதியில் அவற்றை செயற்கைக்கோள் படங்கள் மூலம் கண்டறிய முடியவில்லை என்று தகவல்கள் தெரிவிக்கின்றன.
குறிப்பாக, USS George Washington, USS George H.W. Bush, USS Boxer மற்றும் அவற்றுடன் செயல்பட்டதாகக் கூறப்படும் சில Destroyerகள், செப்டம்பர் தொடக்கத்திலிருந்து அந்தப் பகுதியில் மீண்டும் மீண்டும் மேற்கொள்ளப்பட்ட Sentinel-2 செயற்கைக்கோள் படத் தேடல்களில் தென்படவில்லை எனக் கூறப்படுகிறது.
ஆனால் இதன் அர்த்தம், அந்த அமெரிக்க போர்க்கப்பல்கள் மத்திய கிழக்கு பிராந்தியத்திலிருந்து முழுமையாக வெளியேறிவிட்டன என்பதல்ல. அவை CENTCOM கட்டுப்பாட்டுப் பகுதியில் வேறு இடத்திற்கு நகர்ந்திருக்கலாம். எனவே, செயற்கைக்கோள் படங்களில் ஒரு குறிப்பிட்ட பகுதியில் கப்பல்கள் தென்படவில்லை என்பது மட்டும் அவை அப்பகுதியை விட்டு முழுமையாக வெளியேறிவிட்டன என்பதற்கான உறுதியான ஆதாரமாகாது.
