இம்ரான் கானின் ஆதரவு மாகாணத்தில் அவசரகால நிலை : மோதல்கள் தீவிரமடையும் அபாயம்!
பாகிஸ்தானின் முன்னாள் பிரதமர் இம்ரான் கானின் கட்சிக்கு அதிக ஆதரவு உள்ள கைபர் பக்துன்க்வா மாகாணத்தில் அவசரகால நிலை மற்றும் ஆளுநர் ஆட்சி அமுல்படுத்தப்பட்டுள்ளதால் அரசியல் பதற்றம் அதிகரித்துள்ளது.
கடந்த ஒக்டோபர் 11ஆம் திகதி இந்த நடவடிக்கை எடுக்கப்பட்டதுடன், இம்ரான் கானின் பாகிஸ்தான் தெஹ்ரீக்-இ-இன்சாப் (PTI) கட்சியின் தலைமையிலான மாகாண அரசாங்கத்தின் அதிகாரங்கள் இடைநிறுத்தப்பட்டுள்ளன.
மாகாணத்தில் அதிகரித்து வரும் பயங்கரவாதச் செயற்பாடுகளைக் கட்டுப்படுத்துவதற்காகவே அரசியலமைப்புக்கு அமைவாக இந்த நடவடிக்கை எடுக்கப்பட்டுள்ளதாக பாகிஸ்தான் மத்திய அரசாங்கம் தெரிவித்துள்ளது.
மாகாண அரசாங்கம் பயங்கரவாதக் குழுக்களுடன் தொடர்புகளைப் பேணுவதாக மத்திய தகவல் அமைச்சர் அத்தாவுல்லா தரார் குற்றஞ்சாட்டியுள்ளார். எனினும், PTI இந்தக் குற்றச்சாட்டுகளை நிராகரித்துள்ளதுடன், மத்திய அரசாங்கத்தின் நடவடிக்கை அரசியல் நோக்கம் கொண்டது எனவும் தெரிவித்துள்ளது.
இதற்கிடையில், அவசரகால நிலை அறிவிக்கப்பட்டதைத் தொடர்ந்து பெஷாவர் உள்ளிட்ட பகுதிகளில் வீதிகளில் கொள்கலன்கள் வைக்கப்பட்டு போக்குவரத்துக் கட்டுப்பாடுகள் விதிக்கப்பட்டதுடன், சில பகுதிகளில் பாடசாலைகளும் மூடப்பட்டன.
இந்நிலையில், கடந்த ஒக்டோபர் 13ஆம் திகதி இம்ரான் கானின் ஆதரவாளர்களுக்கும் காவல்துறையினருக்கும் இடையில் மோதல்கள் இடம்பெற்றுள்ளன. கைபர் மாவட்டத்தின் பாரா பகுதியில் இடம்பெற்ற போராட்டத்தின்போது கண்ணீர்ப்புகைப் பிரயோகம் மேற்கொள்ளப்பட்டதாக சர்வதேச ஊடகங்கள் செய்தி வெளியிட்டுள்ளன.
முன்னாள் பிரதமர் இம்ரான் கானை விடுவிக்கக் கோரியும், மத்திய அரசாங்கத்தின் நடவடிக்கைகளுக்கு எதிர்ப்புத் தெரிவித்தும் அவரது ஆதரவாளர்கள் போராட்டங்களில் ஈடுபட்டு வருகின்றனர்.
இதனால், கைபர் பக்துன்க்வா மாகாணத்தில் அரசியல் மோதல்கள் மேலும் தீவிரமடையக்கூடும் என்ற அச்சம் ஏற்பட்டுள்ளது.
