தேவாவின் இசைப் பங்களிப்புக்கு கௌரவம் – இறுதிச் சடங்கில் அரச மரியாதை!
தமிழ் திரைப்படத் துறையில் 1990-களில் தங்களின் இசையால் முத்திரை பதித்த முன்னணி இசையமைப்பாளர்களில் "தேனிசைத் தென்றல்" தேவா மிக முக்கியமானவர் ஆவார்.
முணுமுணுக்கும் வகையிலான மெல்லிசைப் பாடல்கள், கானா பாடல்கள் என 400க்கும் மேற்பட்ட படங்களுக்கு இசையமைத்து எல்லோரின் மனதிலும் இடம் பிடித்தவர். அவர் இன்று காலை திடீரென காலமானார். அவருக்கு வயது 75.
இசையமைப்பாளர் தேவா, ரஜினிகாந்த்,கமல் ஹாசன், விஜய், அஜித் எனத் தமிழ்த் திரையுலகின் முன்னணி நட்சத்திரங்கள் பலரின் படங்களுக்கு சூப்பர் ஹிட் பாடல்களையும், மாஸான பின்னணி இசையையும் வழங்கி ரசிகர்களின் நெஞ்சங்களில் நீங்கா இடம் பிடித்துள்ளார்.
குறிப்பாக, ரஜினிகாந்தின் 'அண்ணாமலை', 'பாட்ஷா' மற்றும் அஜித்தின் 'ஆசை', 'காதல் கோட்டை' போன்ற திரைப்படங்களில் இவருடைய இசை இன்றளவும் கொண்டாடப்படுகிறது. நான்கு தசாப்தங்களுக்கும் மேலாகத் தனது அசாத்திய இசைப் பயணத்தால் தமிழ்த் திரையுலகை ஆளுகை செய்த பெருமை இவருக்குச் சேரும்.
இந்நிலையில் இன்று காலை அவரது தனியார் மருத்துவமனை ஒன்றில் அனுமதிக்கப்பட்டவர் திடீரென காலமாகியிருக்கிறார். அவரது மறைவு குறித்து திரையுலகினர் அதிர்ச்சியிலும் சோகத்திலும் மூழ்கியுள்ளனர். மறைவு குறித்த விபரம் பற்றிய மருத்துவமனை அறிக்கை விரைவில் வெளியாகும் என்றும் நாளை மாலை தேவாவின் இறுதி அஞ்சலி நடக்கவிருப்பதாகவும் தெரிகிறது.
இந்த நிலையில், இசையுலகிற்கு அவர் ஆற்றிய பங்களிப்பைக் கௌரவிக்கும் வகையில், தேவாவின் இறுதிச் சடங்கிற்கு அரச மரியாதை வழங்கப்படும் எனத் தமிழக அரசு அறிவித்துள்ளது.
