போர்த்துக்கலில் வெடித்த மக்கள் போராட்டம் - அரசிடம் முன்வைத்துள்ள கோரிக்கை!
போர்த்துக்கல் நாட்டின் தலைநகர் லிஸ்பனில் உள்ள பாராளுமன்றம் முன்பு ஆயிரக்கணக்கானோர் போராட்டத்தில் ஈடுபட்டனர்.
அந்நாட்டில், அதிகரித்து வரும் வீட்டு வாடகை, விலைவாசி உள்ளிட்டவற்றுக்கு எதிராகவே இந்த போராட்டம் நடைபெற்றது.
போர்ச்சுகல் பாராளுமன்றத்தில் 2027 ஆம் ஆண்டுக்கான அரசின் வரவு செலவு திட்டம் குறித்து விவாதம் நடைபெற்றுக் கொண்டிருந்த போது, இந்தப் போராட்டம் நடைபெற்றது.
இதன்போது, வீடுகளில் இருந்து மக்களை வெளியேற்றுவதை எளிதாக்கும் வகையிலும், புதிய வாடகை ஒப்பந்தங்களுக்கான வாடகைக் கட்டுப்பாடுகளை நீக்கும் வகையிலும் கொண்டுவரப்பட்டுள்ள மசோதாவைத் திரும்பப் பெற வேண்டும் என்று போராட்டக்காரர்கள் வலியுறுத்தினர்.
அனைவருக்கும் குறைந்த விலையில் வீடுகள் கிடைக்க வேண்டும் என்றும், மக்களின் நலன்களைப் பிரதிபலிக்கும் வகையில் அரசின் வரவு செலவு திட்டம் அமைய வேண்டும் என்றும் அவர்கள் கோரிக்கை விடுத்தனர்.
இதேவேளை, லிஸ்பன் மற்றும் போர்டோ நகரங்களில் வீடு வசதி கோரி போராட்டத்தில் ஈடுபட்டவர்கள் அமைத்திருந்த கூடாரங்களை அகற்றுவதற்காக, கடந்த ஞாயிற்றுக்கிழமை பொலிஸார் நடவடிக்கை மேற்கொண்டனர்.
அப்போது தடியடி நடத்தப்பட்டதாகவும், அதிகப்படியான பலப்பிரயோகம் பயன்படுத்தப்பட்டதாகவும் குற்றச்சாட்டுகள் எழுந்தன.
இந்த நடவடிக்கைகளின்போது 3 பொலிஸார் உட்பட 11 பேர் சிறு காயமடைந்ததாக பொலிஸார் தெரிவித்தனர்.
போர்ச்சுகலில் கடந்த 2017ஆம் ஆண்டிலிருந்து வீடுகளின் விலை இருமடங்குக்கும் அதிகமாக உயர்ந்துள்ளது. புதிய வாடகை ஒப்பந்தங்களுக்கான வாடகையும் கிட்டத்தட்ட இருமடங்காக அதிகரித்துள்ளது.
இதனால், இளைஞர்கள் வீடு வாங்குவதிலும் வாடகைக்கு குடியிருப்பதிலும் சிரமங்களைச் சந்தித்து வருகின்றனர். வீட்டு விலை மற்றும் வாடகை உயர்வுக்கு இணையாக ஊதிய உயர்வு இல்லை என்பதே இதற்கு முக்கிய காரணமாக சொல்லப்படுகிறது.
