'அர்னாப்' புயலின் தாக்கம் - வெள்ளத்தில் மூழ்கிய ஒடிசா மாநிலம்
'அர்னாப்' (Arnab) புயலால் ஒடிசாவின் கஞ்சாம் மற்றும் கஜபதி மாவட்டங்களில் இடைவிடாது பெய்து வரும் மழையினால் கடும் வெள்ளம் ஏற்பட்டுள்ளது.
பல கிராமங்கள் வெள்ளத்தில் சிக்கியுள்ள நிலையில், அங்குள்ள மக்களின் பாதுகாப்பை உறுதி செய்ய, அவர்களை ஹெலிகாப்டர் மூலம் மீட்க ஒடிசா அரசு திட்டமிட்டுள்ளது.
வெள்ளத்தில் சிக்கியவர்களை மீட்க கடலோரக் காவல் படையின் ஹெலிகாப்டரை ஏற்பாடு செய்ய, மத்திய உள்துறை அமைச்சகத்துடன் மாநில அரசு தொடர்பில் இருப்பதாக, ஆய்வுக்கூட்டத்திற்குப் பிறகு ஒடிசா தலைமைச் செயலாளர் அனு கார்க் தெரிவித்தார்.
தாரகோட், சனகேமுண்டி, சுராடா மற்றும் பத்ராபூர் ஆகிய வட்டாரங்களுக்கு உட்பட்ட பல கிராமங்கள் வெள்ளத்தால் சூழப்பட்டுள்ளன. இதனால் 2,000க்கும் மேற்பட்ட மக்கள் வெள்ளத்தால் பாதிக்கப்பட்டுள்ளனர். இவர்களில் சுமார் 120 பேர் ஹெலிகாப்டர் மூலம் மீட்கப்பட்டுள்ளதாக அதிகாரிகள் தெரிவித்துள்ளனர்.
இதேவேளை, மாவட்ட நிர்வாகத்தின் உயர் அதிகாரிகள் களத்தில் நிலைமையை ஆய்வு செய்து வருகின்றனர். மேலும், மீட்பு மற்றும் நிவாரணப் பணிகளில் மாவட்ட நிர்வாகத்திற்கு உதவ, ஒடிசா பேரிடர் விரைவு அதிரடிப் படையின் (ODRAF) கூடுதல் குழுக்கள் கஞ்சாம் மாவட்டத்திற்கு அனுப்பி வைக்கப்படுவதாக தலைமைச் செயலாளர் கூறினார்.
வானிலை ஆய்வு மையத் தகவல்களின்படி, கடந்த 24 மணி நேரத்தில் கஞ்சாம் மாவட்டத்தின் பத்ராபூர் வட்டாரத்தில் அதிகபட்சமாக 546.6 மி.மீ மழை பதிவாகியுள்ளது. அதேபோல், மாவட்டத்தின் பிற வட்டாரங்களான சுராடா, சனகேமுண்டி, சிக்கிட்டி, திகபஹண்டி மற்றும் ரங்கேலுண்டா ஆகிய இடங்களிலும் 200 மி.மீ.க்கும் அதிகமான மழை பெய்துள்ளது.
