ஸ்டார் ட்ரெக், எக்ஸ்-மென் திரைப்படப் புகழ் பிரித்தானிய நடிகர் சேர் பெட்ரிக் ஸ்டீவர்ட் காலமானார்!
பிரபல பிரித்தானிய மேடை மற்றும் திரைப்பட நடிகரான சேர் பெட்ரிக் ஸ்டீவர்ட் (Sir Patrick Stewart) தனது 86ஆவது வயதில் காலமானார்.
உலகப் புகழ்பெற்ற 'ஸ்டார் ட்ரெக்: தி நெக்ஸ்ட் ஜெனரேஷன்' (Star Trek: The Next Generation) தொடரில் கேப்டன் ஜீன்-லூக் பிகார்ட் (Captain Jean-Luc Picard) கதாபாத்திரத்திலும், 'எக்ஸ்-மென்' (X-Men) திரைப்படங்களில் பேராசிரியர் சார்லஸ் சேவியர் (Professor Charles Xavier) கதாபாத்திரத்திலும் நடித்து உலகளாவிய ரசிகர்களின் கவனத்தை ஈர்த்தவர் இவர்.
அவரது மறைவு தொடர்பான அறிவிப்பை அவரது சமூக வலைத்தளப் பக்கத்தில் குடும்பத்தினர் வெளியிட்டுள்ளனர்.
நோய்களுடன் குறுகிய காலம் போராடிய நிலையில், அமெரிக்காவின் லொஸ் ஏஞ்சல்ஸில் உள்ள தனது இல்லத்தில் கடந்த புதன்கிழமை (ஒக்டோபர் 28) அவர் உயிரிழந்ததாக அந்த அறிக்கையில் தெரிவிக்கப்பட்டுள்ளது.
1940ஆம் ஆண்டு ஜூலை 13ஆம் திகதி இங்கிலாந்தின் யோர்க்ஷயர் பகுதியில் உள்ள மிர்ஃபீல்ட் நகரில் பிறந்த பெட்ரிக் ஸ்டீவர்ட், தனது 60 ஆண்டுகளுக்கும் மேலான கலைப் பயணத்தில் மேடை நாடகங்கள், தொலைக்காட்சித் தொடர்கள் மற்றும் திரைப்படங்கள் எனப் பல்வேறு துறைகளில் தனது திறமையை வெளிப்படுத்தியுள்ளார்.
குறிப்பாக, 1987ஆம் ஆண்டு ஆரம்பமான 'ஸ்டார் ட்ரெக்: தி நெக்ஸ்ட் ஜெனரேஷன்' தொடரின் மூலம் சர்வதேச அளவில் பெரும் புகழைப் பெற்றார்.
ஏழு பருவங்களாக ஒளிபரப்பான இந்தத் தொடரிலும் அதன் தொடர்ச்சியான திரைப்படங்களிலும் கேப்டன் ஜீன்-லூக் பிகார்ட் கதாபாத்திரத்தில் நடித்தார்.
அதேபோன்று, 2000ஆம் ஆண்டு வெளியான முதல் 'எக்ஸ்-மென்' திரைப்படம் முதல் பல பாகங்களில் பேராசிரியர் சார்லஸ் சேவியர் கதாபாத்திரத்தில் நடித்து ரசிகர்களின் மனதில் நீங்கா இடம்பிடித்தார்.
திரைப்படத் துறைக்கு அப்பால், ஷேக்ஸ்பியரின் நாடகங்களில் சிறப்பான நடிப்பை வெளிப்படுத்திய அவர், ரோயல் ஷேக்ஸ்பியர் நிறுவனத்திலும் (Royal Shakespeare Company) நீண்டகாலம் பணியாற்றியுள்ளார்.
நாடகக் கலைக்கான அவரது சிறப்பான பங்களிப்பைப் பாராட்டி, 2010ஆம் ஆண்டு பிரித்தானியாவின் இரண்டாம் எலிசபெத் மகாராணியால் அவருக்கு 'நைட்' பட்டம் வழங்கப்பட்டது. இதன் பின்னர் அவர் சேர் பெட்ரிக் ஸ்டீவர்ட் என அழைக்கப்பட்டார்.
அவரது மறைவைத் தொடர்ந்து திரையுலகப் பிரபலங்கள் மற்றும் ரசிகர்கள் பலரும் தங்களது இரங்கல்களைத் தெரிவித்து வருகின்றனர்.
அவரது மனைவி சன்னி ஓசெல் (Sunny Ozell), இரு பிள்ளைகள் மற்றும் உலகம் முழுவதும் உள்ள கோடிக்கணக்கான ரசிகர்கள் அவரை நினைவுகூர்ந்து வருகின்றனர்.
