வாக்குகளை திருடிய அரபுக் கட்சிகள்: நெதன்யாகுவின் குற்றச்சாட்டை நிராகரித்தனர் தேர்தல் அதிகாரிகள்!
இந்த ஒக்ரோபர் மாத இறுதியில் நடைபெற்ற க்நெசெட் (Knesset) எனப்படும் இஸ்ரேலிய நாடாளுமன்ற அவைத் தேர்தல் முடிவுகள், அந்நாட்டின் அரசியல் அரங்கில் பெரும் அதிர்வலைகள், இழுபறி நிலைகளை உருவாக்கியுள்ளன.
தற்போதைய பிரதமர் பெஞ்சமின் நெதன்யாகுவின் தீவிர வலதுசாரி கூட்டணிக்கு பெரும்பான்மை கிடைக்காமல் போனதை அடுத்து, இஸ்ரேல் கடுமையான அரசியல் முடக்க நிலையை (Deadlock) எதிர்கொண்டுள்ளது.
மொத்தமுள்ள 120 ஆசனங்களைக் கொண்ட நாடாளுமன்றத்தில் ஆட்சி அமைப்பதற்கு 61 ஆசனங்கள் தேவை என்ற நிலையில், பிரதான அணிகள் எவற்றுக்கும் பெரும்பான்மை கிடைக்கவில்லை.
நெதன்யாகுவின் வலதுசாரிக் கூட்டணி ஆக 53 ஆசனங்களை மாத்திரமே பெற்று பின்னடைவைச் சந்தித்துள்ளது. ஆனால், இவரது லிக்குட் கட்சி 27 ஆசனங்களுடன் தனிப்பெரும் கட்சியாக வந்துள்ளது.
நெதன்யாகு எதிர்ப்பு சீர்திருத்தக் கூட்டணி காடி ஐசன்கோட் தலைமையிலான இந்த அணி 48 ஆசனங்களைக் கைப்பற்றியுள்ளது.
அரபுக் கட்சிகளின் கூட்டமைப்பு முன்னெப்போதும் இல்லாத வகையில் 19 ஆசனங்களைப் பெற்று, ஆட்சியமைப்பைத் தீர்மானிக்கும் முக்கிய சக்தியாக (Kingmaker) உருவெடுத்துள்ளது.
இஸ்ரேலின் தற்போதைய அரசியல் யாப்புச் சட்ட ஏற்பாடுகளின்படி, புதிய அரசாங்கமொன்று உத்தியோகபூர்வமாக அமையும் வரை பெஞ்சமின் நெதன்யாகுவே தற்காலிகப் பிரதமராக (Caretaker PM) பதவியில் நீடிப்பார்.
நெதன்யாகுவை ஆட்சியில் இருந்து அகற்றுவதையே பிரதான நோக்கமாகக் கொண்டுள்ள அரபுக் கட்சிகள், எதிர்க்கட்சிக் கூட்டணிக்கு வெளியில் இருந்து ஆதரவளிக்கத் தயாராக உள்ளதாக அறிவித்துள்ளன.
எனினும், எதிர்க்கட்சியில் உள்ள சில தீவிர யூதத் தேசியவாதத் தலைவர்கள் அரபுக் கட்சிகளுடன் கூட்டுச் சேர மறுத்து வருகின்றமை அங்கு இழுபறியை ஏற்படுத்தியுள்ளது.
அரபுக் கட்சிகள் செல்வாக்கு செலுத்தினாலும், அது ஈரான் மீதான இஸ்ரேலின் போர் உத்திகளிலோ அல்லது பிராந்திய இராணுவக் கொள்கைகளிலோ பாரிய மாற்றங்களை ஏற்படுத்தாது என்றே சர்வதேச அரசியல் ஆய்வாளர்கள் கருதுகின்றனர்.
ஏனெனில், இஸ்ரேல் அரசியல் தலைவர்களும் முன்னாள் இராணுவத் தளபதிகளுமே நெதன்யாகுவை எதிர்க்கும் யூதக் கட்சிகளாகும். கட்சி அரசியல் வேறுபாடுகள் இருந்தாலும், ஈரான் மற்றும் ஹிஸ்புல்லா விவகாரத்தில் இக் கட்சிகள் அனைத்தும் ஒரே நிலைப்பாட்டையே கொண்டுள்ளன.
அதேவேளை, இந்தத் தேர்தல் முடிவுகள் குறித்து அமெரிக்கா உன்னிப்பாக அவதானித்து வருகின்றது. பெஞ்சமின் நெதன்யாகுவின் தீவிரப் போக்கு, காசா மற்றும் லெபனான் மீதான போர் நிறுத்தப் பேச்சுவார்த்தைகளுக்கு பெரும் முட்டுக்கட்டையாக இருப்பதாக அமெரிக்கா கருதுகின்றது.
நெதன்யாகுவின் தீவிர வலதுசாரி பங்காளிகள் (Extremist coalition partners) இல்லாத ஒரு 'தேசிய கூட்டு அரசாங்கம்' (Unity Government) இஸ்ரேலில் மலர வேண்டும் என்பது அமெரிக்காவின் தற்போதைய எதிர்பார்ப்பாகும்.
அவ்வாறானதொரு மிதவாத அரசு அமைந்தால் மட்டுமே காசாவில் நிரந்தரப் போர் நிறுத்தத்தைக் கொண்டுவரவும், பிணைக் கைதிகளை விடுவிக்கவும் முடியும் என அமெரிக்கா நம்புகின்றது.
பிபிசி, அல்-ஜசீரா போன்ற சர்வதேச ஆங்கில ஊடகங்கள், இத்தேர்தலை நெதன்யாகுவின் மீதான 'மக்கள் தீர்ப்புப் பரிசோதனை' என வர்ணித்துள்ளன.
போர்ச் சூழலுக்கு மத்தியிலும் 78% என்ற மிக உயர்ந்த வாக்குப்பதிவு இடம்பெற்றுள்ளமை, இஸ்ரேலிய மக்கள் மாற்றத்தை விரும்புகின்றார்கள் என்பதையே காட்டுவதாக அந்த ஊடகங்கள் சுட்டிக்காட்டியுள்ளன.
ஆகவே, நெதன்யாகுவின் வீழ்ச்சி மேற்குக்கரை (West Bank) ஆக்கிரமிப்புகளைச் சற்றுக் குறைக்க உதவலாமே தவிர, பாலஸ்தீனத்திற்கான தனிநாட்டுக் கோரிக்கைக்கு (Two-State Solution) இஸ்ரேலின் எந்தவொரு யூதக் கட்சியும் முழுமையான ஆதரவை வழங்கப் போவதில்லை என்பது தெளிவு.
எனினும், இஸ்ரேலில் ஏற்பட்டுள்ள இந்த அரசியல் பலவீனத்தைப் பயன்படுத்தி, சர்வதேச நாடுகள் பிராந்திய அமைதிக்கான அழுத்தங்களை மேலும் அதிகரிக்கக்கூடும் என எதிர்பார்க்கப்படுகிறது.
எந்தவொரு கூட்டணியும் அமையாவிட்டால், 2027 ஆம் ஆண்டின் முற்பகுதியில் இஸ்ரேல் மற்றொரு பொதுத் தேர்தலை சந்திக்க நேரிடும் என்பது உறுதி.
அதேவேளை, அரபுக் கட்சிகள் கத்தார் அரசிடம் இருந்தும் நிதி பெற்று தேர்தலில் முறைகேடு செய்து வாக்குகளை "திருடிவிட்டதாக" நெதன்யாகு மற்றும் அவரது லிக்குட் கட்சி குற்றம் சாட்டியிருந்தனர்.
எனினும், இஸ்ரேலிய தேர்தல் அதிகாரிகள் மற்றும் காவல்துறை இந்த முறைகேடு முறைப்பாடுகளினால் தேர்தல் முடிவுகள் மாறாது என்றும், தேர்தல் முடிவுகள் அப்படியே நிலைத்து நிற்கும் என்றும் அறிவித்துள்ளனர்.
