ட்ரம்ப் நிர்வாகத்தில் முதல் விக்கெட் சரிந்தது! இடைத்தேர்தல் தோல்வி எதிரொலி
அமெரிக்காவில் கடந்த நவம்பர் 3-ஆம் திகதி நடைபெற்ற பரபரப்பான இடைக்காலத் தேர்தலில் ஜனாதிபதி டொனால்ட் ட்ரம்பின் குடியரசுக் கட்சி நாடாளுமன்றத்தின் இரு அவைகளிலும் தனது பெரும்பான்மையை இழந்து பலத்த பின்னடைவைச் சந்தித்தது.
இந்தத் தேர்தல் தோல்வியைத் தொடர்ந்து, ட்ரம்ப் நிர்வாகத்திலிருந்து விலகிய முதல் மூத்த அதிகாரியாக இந்திய வம்சாவளியைச் சேர்ந்த ஹர்மீத் கவுர் தில்லன் மாறியுள்ளார்.
ட்ரம்ப் அரசாங்கத்தில் குடிமை உரிமைகள் பிரிவின் தலைவராகவும் உதவி அட்டார்னி ஜெனரலாகவும் பணியாற்றி வந்த ஹர்மீத் தில்லன், ட்ரம்பின் தீவிர ஆதரவாளராக அறியப்பட்டவர்.
இவரது விலகல் குறித்து அட்டார்னி ஜெனரல் டாட் பிளான்ச் தனது ‘எக்ஸ்’ பக்கத்தில், "ஹர்மீத் ஒவ்வொரு அமெரிக்கரின் குடிமை உரிமைகளையும் அச்சமின்றி, பாரபட்சமின்றி பாதுகாத்தார். சட்டத்தை உறுதியாக அமல்படுத்திய அவரது சிறப்பான சேவைக்கு எங்கள் நன்றிகள்" எனக் குறிப்பிட்டு வாழ்த்து தெரிவித்துள்ளார்.
சண்டிகரில் பிறந்து, குடும்பத்துடன் பிரிட்டன் வழியாக அமெரிக்காவில் குடியேறிய ஹர்மீத், 18 மாத பதவிக்காலத்தில் தனது தனித்துவமான செயல்பாடுகளால் கவனம் ஈர்த்தவர். ட்ரம்ப் ஆதரவாளர் என்றாலும், குடியேறிகள் விஷயத்தில் நியாயத்தின் பக்கம் நின்றவர்.
குறிப்பாக, கடந்த ஒகஸ்ட் மாதம் சீக்கிய பாரவூர்தி ஓட்டுநர் ஒருவர் விபத்தை ஏற்படுத்தியபோது, இந்திய மற்றும் சீக்கிய ஓட்டுநர்கள் மீது ஒட்டுமொத்தமாகச் சுமத்தப்பட்ட குற்றச்சாட்டுகளைக் கடுமையாக எதிர்த்தார்.
"இங்கு சட்டப்பூர்வமாக வாழும் சீக்கியர்கள் மிகுந்த தேசபக்தியும் கடின உழைப்பும் கொண்டவர்கள்; அசம்பாவிதங்களைச் சாதகமாக்கி அவர்களைக் குறிவைக்கக் கூடாது" எனத் துணிச்சலாகக் குரல் கொடுத்தார்.
தான் தேர்தல் முடிவுகளுக்குப் பயந்து உடனே விலகவில்லை என்பதையும் ஹர்மீத் தெளிவுபடுத்தியுள்ளார். இடைத்தேர்தலுக்கு ஒரு மாதத்திற்கு முன்பே தனது இராஜினாமா கடிதத்தை சமர்ப்பித்துவிட்டதாகவும், ட்ரம்பின் தலைமை ஊழியர் சூசி வைல்ஸ் கேட்டுக்கொண்டதாலேயே தேர்தல் வரை பதவியில் நீடித்ததாகவும் ‘பொக்ஸ் நியூஸ்’ தளத்திற்கு அளித்துள்ள பேட்டியில் தெரிவித்துள்ளார்.
அமெரிக்க அரசியல் வழக்கப்படி, இடைக்காலத் தேர்தலுக்குப் பிறகு ஜனாதிபதி தனது அமைச்சரவையை மறுசீரமைக்க ஏதுவாக மூத்த அதிகாரிகள் பதவி விலகுவது இயல்பு என்றாலும், தேர்தல் தோல்விக்குச் சூடாக ஹர்மீத்தின் இந்த விலகல் வெளியாகியுள்ளது அமெரிக்க அரசியலில் பெரும் விவாதத்தைக் கிளப்பியுள்ளது.
