பிரிட்டன் வானை மூடும் சகாரா புழுதி; ஆய்வில் எச்சரிக்கை
ஆப்பிரிக்காவின் சகாரா பாலைவனத்தில் இருந்து கிளம்பும் பிரம்மாண்ட புழுதிப் புயல் (Saharan Dust Plume) தீவிரமடைந்து, பிரிட்டன் மற்றும் ஐரோப்பிய வான்பகுதியை மூடி வருவதாகப் புதிய அறிவியல் ஆய்வுகள் எச்சரித்துள்ளன.
சுவீடனின் Lund University மற்றும் இங்கிலாந்தின் Manchester University இணைந்து நடத்திய புதிய ஆய்வின்மூலம் இத்தகவல்கள் வெளிவந்துள்ளன.
இதனால் பிரிட்டனின் வான்பகுதி முற்றிலும் மங்கலான ஆரஞ்சு நிறமாக மாறுவதுடன், அங்கு 'இரத்த மழை' (Blood Rain) எனப்படும் செம்பழுப்பு நிற மழை பொழிவதற்கான அபாயம் ஏற்பட்டுள்ளதாக அறிவிக்கப்பட்டுள்ளது.
புவி வெப்பமயமாதல் காரணமாகச் சகாராவின் வறண்ட பரப்பளவு அதிகரித்து வருவதே இந்த அசாதாரண சூழலுக்குக் காரணம் என வானிலை வல்லுநர்கள் தெரிவித்துள்ளனர்.
ஸ்வீடனின் லண்ட் பல்கலைக்கழகம் (Lund University) மற்றும் இங்கிலாந்தின் மான்செஸ்டர் பல்கலைக்கழகம் ஆகியவை இணைந்து மேற்கொண்ட ஆய்வின்படி, கடந்த பத்தாண்டுகளில் ஐரோப்பிய வான்வெளியில் பரவும் பாலைவனப் புழுதியின் அளவு 10% முதல் 25% வரை கணிசமாக அதிகரித்துள்ளமை கண்டறியப்பட்டுள்ளது.
வளிமண்டலத்தில் மிதக்கும் இந்த நுண் துகள்கள், மழையோடு சேர்ந்து கீழே இறங்கும்போது கார்கள், ஜன்னல்கள் மற்றும் கட்டிடங்களின் மீது செம்பழுப்பு நிறத்திலான களிமண் போன்ற படிவுகளை ஏற்படுத்துகின்றன.
அறிவியல் பூர்வமாக இது வெறும் தூசு கலந்த மழைதான் என்றாலும், இதன் அச்சுறுத்தும் தோற்றம் காரணமாகவே இது 'இரத்த மழை' என்று அழைக்கப்படுகிறது.
பருவநிலை மாற்றத்தின் தீவிரம் இப்படியே தொடர்ந்தால், இந்த நூற்றாண்டின் இறுதிக்குள் வான்வெளியில் பரவும் சகாரா புழுதியின் அளவு மேலும் 40% முதல் 60% வரை அதிகரிக்கக்கூடும் என ஆராய்ச்சியாளர்கள் எச்சரிக்கின்றனர்.
இந்த அதீத புழுதியால் பிரிட்டனின் காற்றுத் தரம் மிக மோசமாகப் பாதிக்கப்பட்டு, காற்றில் கண்ணுக்குத் தெரியாத '‘PM10’' நுண்துகள்களின் அளவு அபாயக் கட்டத்தைத் தாண்டும்.
இது ஆஸ்துமா போன்ற சுவாசப் பாதிப்புகள் மற்றும் இதய நோய்களைக் கொண்ட முதியவர்களுக்கும், குழந்தைகளுக்கும் கடுமையான உடல்நலக் குறைபாடுகளை ஏற்படுத்தும் என மருத்துவ வல்லுநர்கள் எச்சரித்துள்ளனர்.
மேலும், வான்வெளியில் அடர்த்தியாகப் படரும் இந்த புழுதிப் படலம் சூரிய ஒளியைத் தடுத்து, சூரிய ஆற்றல் (Solar Energy) கட்டமைப்புகளின் மின் உற்பத்தியைக் கணிசமாகக் குறைப்பதுடன், விமானப் போக்குவரத்துக்கான தொலைநோக்குத் திறனையும் (Visibility) பாதிக்கும்.
எனவே, ஐரோப்பிய நாடுகள் இந்த சுற்றுச்சூழல் அச்சுறுத்தலை வெறும் இயற்கை நிகழ்வாகக் கடந்து போகாமல், கூட்டு நடவடிக்கை மூலம் முன்னெச்சரிக்கை எச்சரிக்கை அமைப்புகளை (Early Warning Systems)வலுப்படுத்த வேண்டும் என இந்த ஆய்வு வலியுறுத்துகிறது.
