இந்தியாவில் 40,000 கிலோ நெய்யால் கட்டப்பட்ட அதிசயக் கோவில்
இந்தியாவின் ராஜஸ்தான் மாநிலத்தில் உள்ள பிகானேர் (Bikaner) நகரில் அமைந்துள்ள பண்டசார் சமணக் கோவில் (Bhandasar Jain Temple) தான் 40,000 கிலோ தூய நெய்யைப் பயன்படுத்தி கட்டப்பட்ட அந்த அதிசயக் கோவிலாகும்.
15-ஆம் நூற்றாண்டில் கட்டப்பட்ட இந்த வரலாற்றுச் சிறப்புமிக்க கோவில், இந்தியாவின் மிகச்சிறந்த கட்டிடக்கலை அதிசயங்களில் ஒன்றாகக் கருதப்படுகிறது.
பண்டசா ஓஸ்வால் என்ற பணக்கார சமண வணிகரால் 1468-ஆம் ஆண்டில் இந்தக் கோவிலின் கட்டுமானப் பணிகள் தொடங்கப்பட்டன. அந்தக் காலகட்டத்தில் பிகானேர் பகுதியில் கடுமையான தண்ணீர் பற்றாக்குறை நிலவியதால், கட்டுமானத்திற்கான சுண்ணாம்பு கலவையை தயாரிக்கும் போது தண்ணீருக்குப் பதிலாக சுமார் 40,000 கிலோ தூய நெய் பயன்படுத்தப்பட்டதாகப் பல தலைமுறைகளாகக் கூறப்பட்டு வருகிறது.
இப்பகுதி மக்களின் நம்பிக்கையின்படி, கோடைக் காலத்தில் வெயிலின் தாக்கம் அதிகரித்து வெப்பநிலை 45°C-க்கு மேல் உயரும் போது, இந்தக் கோவிலின் பழமையான கல் தரைப்பகுதிகள் மற்றும் சுவர்களில் இருந்து நெய் போன்ற பசை போன்ற எண்ணெய் பிசுபிசுப்பு கசிவதாகக் குறிப்பிடுகிறார்கள்.
இந்த 3 அடுக்குக் கோவில், சமண சமயத்தின் 5-ஆவது தீர்த்தங்கரரான சுமதிநாதருக்கு அர்ப்பணிக்கப்பட்டுள்ளது. இது பொதுவாகச் சமணக் கோவில்களில் காணப்படும் வெள்ளை நிறப் பளிங்கு கற்களுக்குப் பதிலாக. அழகிய சிவப்பு மணற்கற்கள் மற்றும் மஞ்சள் கற்களால் கட்டப்பட்டுள்ளது.
கோவிலின் உட்புறச் சுவர்கள், தூண்கள் மற்றும் கூரைகள் ஆகியவை தங்க இலை ஓவியங்கள் , கண்ணாடிப்பணிகள் மற்றும் 24 தீர்த்தங்கரர்களின் வாழ்க்கை வரலாற்றைக் கூறும் சுவரோவியங்களால் மிக அழகாக அலங்கரிக்கப்பட்டுள்ளன.
இந்தக் கோவில் தற்போது இந்திய தொல்லியல் துறையின் பாதுகாப்பில் உள்ள ஒரு முக்கிய பாரம்பரியச் சின்னமாகும்.
