யூத மாணவர்களை பாதுகாக்கத் தவறியதாக மெக்கில் பல்கலைக்கழகத்திற்கு எதிரான கூட்டு வழக்கிற்கு நீதிமன்ற அனுமதி
கனடாவின் கியூபெக் உயர் நீதிமன்றம், யூத மாணவர்களை பாகுபாடு மற்றும் வெறுப்புச் செயல்களிலிருந்து பாதுகாக்கத் தவறியதாகக் கூறி, மெக்கில் (McGill) பல்கலைக்கழகத்திற்கு எதிராக தொடரப்பட்ட கூட்டு (Class Action) வழக்கை விசாரணைக்கு ஏற்றுக்கொண்டுள்ளது.
இந்த வழக்கை மெக்கில் பல்கலைக்கழக இளநிலை மாணவர் டேவிட் கோப்ரின் (David Cobrin), அங்கு கல்வி பயிலும் யூத மாணவர்களின் சார்பில் முன்னெடுத்துள்ளார். அவருக்கு Fishman Flanz Meland Paquin LLP சட்ட நிறுவனம் சட்ட உதவி வழங்குகிறது.
16 பக்கங்கள் கொண்ட தீர்ப்பில், நீதிபதி டொமினிக் பவுலின், 2023 அக்டோபர் 7-ஆம் தேதிக்குப் பின்னர் மெக்கில் பல்கலைக்கழகத்தில் ஏற்பட்ட சூழ்நிலையை "விதிவிலக்கானதும் சிக்கலானதும்" எனக் குறிப்பிட்டுள்ளார்.
யூத விரோதம் (Antisemitism) மற்றும் சியோனிச எதிர்ப்பு (Anti-Zionism) கருத்துக்கள் வளாகத்தில் பரவியதாக முன்வைக்கப்பட்ட குற்றச்சாட்டுகள், நீதிமன்ற விசாரணைக்கு உரிய அளவுக்கு முக்கியத்துவம் வாய்ந்தவை என அவர் தெரிவித்துள்ளார்.
2023 அக்டோபர் 8 முதல், இந்த வழக்குக்கான அதிகாரப்பூர்வ அறிவிப்பு வெளியிடப்படும் நாள் வரை மெக்கில் பல்கலைக்கழகத்தில் பதிவு செய்யப்பட்டிருந்த அனைத்து யூத மாணவர்களும் இந்த கூட்டு வழக்கில் இடம்பெறுகின்றனர். இதில் இளநிலை, முதுநிலை, தொடர்கல்வி, முனைவர் பட்டம் மற்றும் பிந்தைய முனைவர் பட்ட மாணவர்களும் அடங்குகின்றனர்.
இஸ்ரேல்–பாலஸ்தீன மோதலைத் தொடர்ந்து பல்கலைக்கழக வளாகத்தில் நடைபெற்ற போராட்டங்களின் போது, யூத மாணவர்கள் யூத விரோத மற்றும் சியோனிச எதிர்ப்பு பேச்சுகள், மிரட்டல், துன்புறுத்தல் மற்றும் தாக்குதல்களுக்கு உள்ளானதாக மனுவில் குற்றம்சாட்டப்பட்டுள்ளது.
இதுகுறித்து B’nai Brith Canada அமைப்பின் கியூபெக் மற்றும் அட்லாண்டிக் பிராந்திய இயக்குநர் பவோலா சாமுவேல் வெளியிட்ட அறிக்கையில், "மெக்கில் பல்கலைக்கழகத்தின் யூத மாணவர்கள் நீதிமன்றத்தில் தங்கள் தரப்பை முன்வைக்கும் வாய்ப்பை இந்தத் தீர்ப்பு வழங்குகிறது" என்று தெரிவித்துள்ளார்.
இதற்கு பதிலளித்த மெக்கில் பல்கலைக்கழகம், யூத விரோதத்தைத் தடுக்கும் மற்றும் அதனை உரிய முறையில் கையாளும் வகையில் பல்வேறு நடவடிக்கைகள் ஏற்கனவே மேற்கொள்ளப்பட்டுள்ளதாக தெரிவித்துள்ளது.
மேலும், "வெறுப்பு, சகிப்புத்தன்மையின்மை மற்றும் எந்தவிதமான பாகுபாடு அல்லது தொல்லைக்கும் மெக்கில் பல்கலைக்கழகத்தில் இடமில்லை. அனைத்து மாணவர்களும் பாதுகாப்பான, மரியாதையான மற்றும் உள்ளடக்கிய கல்விச் சூழலில் கல்வி கற்கும் உரிமை கொண்டவர்கள்" என்று பல்கலைக்கழகம் தனது அறிக்கையில் வலியுறுத்தியுள்ளது.
