டூரிஸ்ட ஏமாத்துறதே இந்த நாட்டுக்கு பொழப்பு... 2-வது இடத்தை பிடித்த டென்மார்க்; சீனா எந்த இடம் தெரியுமா?
ஒரு நகரம் மற்றும் அங்குள்ள முக்கிய ஈர்ப்பு மையங்கள் குறித்து சுற்றுலாப் பயணிகள் எவ்வளவு எதிர்மறையான, ஏமாற்றமளிக்கும் விமர்சனங்களை எழுதியுள்ளனர் என்பதைக் கணக்கிட்டே இந்தத் தரவரிசை வெளியிடப்பட்டுள்ளது.
மிகவும் பரபரப்பான சாகசங்கள், கண்கவர் அழகிய இடங்கள் மற்றும் மாயாஜாலமான அனுபவங்களை அள்ளித்தரும் என்று விளம்பரப்படுத்தப்படும் ஒரு நகரத்திற்கு நீங்கள் சென்றதுண்டா? அப்படிச் சென்று, அங்கு உண்மையிலேயே இருந்த சூழலைப் பார்த்து முற்றிலும் ஏமாற்றம் அடைந்தது உண்டா? உலக அளவில் பயணம் செய்யும் பல சுற்றுலாப் பயணிகளுக்கு, சில புகழ்பெற்ற சுற்றுலாத் தலங்களில் இந்த கசப்பான அனுபவம் நிகழ்ந்துள்ளது.
முடிவில்லாத நீண்ட வரிசைகள், அளவுக்கு அதிகமான கூட்ட நெரிசல் நிறைந்த தெருக்கள் அல்லது பெயருக்கு ஏற்ற வசீகரம் இல்லாத சூழல் எனப் பல காரணங்களால், இந்தப் பட்டியலில் உள்ள நகரங்கள் பயணிகளுக்கு ஏமாற்றத்தையே தந்துள்ளன. உலகளவில் சுற்றுலாப் பயணிகளைப் பெரிதும் ஏமாற்றிய முக்கிய நகரங்கள் மற்றும் அவை ஏன் கெட்ட பெயர் பெற்றன என்பதன் விவரங்களை இங்கு காண்போம்.
பிரபலமான சுற்றுலாத் தலங்களின் இணையதளப் பயண விமர்சனங்களை (Online Travel Reviews) ஆய்வு செய்து இப்பட்டியல் தயாரிக்கப்பட்டுள்ளது. ஒரு நகரம் மற்றும் அங்குள்ள முக்கிய ஈர்ப்பு மையங்கள் குறித்து சுற்றுலாப் பயணிகள் எவ்வளவு எதிர்மறையான, ஏமாற்றமளிக்கும் விமர்சனங்களை எழுதியுள்ளனர் என்பதைக் கணக்கிட்டே இந்தத் தரவரிசை வெளியிடப்பட்டுள்ளது.
ஹாங்காங், சீனா (Hong Kong, China)
இந்தப் பட்டியலில் முதலிடத்தைப் பிடிக்கும் ஹாங்காங் நாட்டிற்குச் சென்றவர்களில் 12.2% பயணிகள் ஏமாற்றமடைந்துள்ளதாகத் தெரிவித்துள்ளனர். குறிப்பாக, அந்த நகரின் 'பாக் டிராம்' (The Peak Tram) என்ற ரயில் சேவையே பயணிகளைப் பெரிதும் அதிருப்தியடையச் செய்த இடமாகச் சுட்டிக்காட்டப்பட்டுள்ளது.
கோபன்ஹேகன், டென்மார்க் (Copenhagen, Denmark)
கோபன்ஹேகன் நகரமும் ஹாங்காங்கைப் போலவே 12.2% சுற்றுலாப் பயணிகளுக்கு ஏமாற்றத்தையே தந்துள்ளது. நகரின் புகழ்பெற்ற வர்த்தகத் தெருவான 'ஸ்ட்ரோகெட்' (Stroget) பகுதிதான், சுற்றுலாப் பயணிகளின் எதிர்பார்ப்பைப் பூர்த்தி செய்யத் தவறிய முதன்மை இடமாகக் குறிப்பிடப்பட்டுள்ளது.
அபுதாபி, ஐக்கிய அரபு அமீரகம் (Abu Dhabi, UAE)
கடந்த ஆண்டுகளை விட இந்த ஆண்டு அபுதாபிக்குச் சென்ற சுற்றுலாப் பயணிகளிடையே அதிருப்தி அதிகரித்துள்ளது. அங்குச் சென்றவர்களில் 12.3% பேர் ஏமாற்றமடைந்துள்ளனர். அதில், புகழ்பெற்ற 'ஃபெராரி வேர்ல்ட்' (Ferrari World) கருப்பொருள் பூங்காவே (Theme Park) பயணிகளை அதிகளவில் ஏமாற்றிய இடமாகக் கூறப்படுகிறது.
கேப் டவுன், தென்னாப்பிரிக்கா (Cape Town, South Africa)
ஆண்டுதோறும் தனது தரவரிசையில் பெரிய மாற்றமின்றித் தொடரும் கேப் டவுன் நகரம், இன்னமும் 12.4% சுற்றுலாப் பயணிகளை ஏமாற்றத்தில் தள்ளி வருகிறது. குறிப்பாக, அங்குள்ள 'ராபன் தீவு அருங்காட்சியகம்' (Robben Island Museum) பயணிகளின் எதிர்பார்ப்பைப் பூர்த்தி செய்யவில்லை.
போர்ட்டோ, போர்ச்சுகல் (Porto, Portugal)
போர்ச்சுகலின் போர்ட்டோ நகரம் 12.6% ஏமாற்ற விகிதத்தைப் பதிவு செய்துள்ளது. இந்த நகரம் சுற்றுலாப் பயணிகளிடையே பிரபலமாக இருந்தாலும், தங்களின் அதிகப்படியான எதிர்பார்ப்புகளுக்கு இது முழுமையாக ஈடுகொடுக்கவில்லை என்றே பல பயணிகள் கருதுகின்றனர்.
