2027-ல உலகமே வெப்பத்துல கொதிக்கப் போகுதா?
Super El Nino 2027: சில வானிலை ஆய்வாளர்கள், இது கடந்த 1,000 ஆண்டுகளில் இல்லாத அளவுக்கு வலிமையான எல் நினோவாக இருக்கலாம் என்று கூறுகின்றனர். ஆனால், இந்தக் கூற்றுக்கு தற்போது உறுதியான ஆதாரம் இல்லை என்று விஞ்ஞானிகள் விளக்குகின்றனர்.
பசிபிக் பெருங்கடலில் உருவாகி வரும் எல் நினோ (El Nino) காலநிலை நிகழ்வு, 2026 ஆம் ஆண்டின் இறுதிக்குள் மிகவும் சக்திவாய்ந்த நிலையை அடையக்கூடும் என்று காலநிலை விஞ்ஞானிகள் எச்சரித்துள்ளனர். இது நடந்தால், 2027 ஆம் ஆண்டு உலகளவில் கடும் வெப்பம், வறட்சி, கனமழை, வெள்ளம் உள்ளிட்ட தீவிர வானிலை மாற்றங்கள் அதிகரிக்கலாம் என்ற அச்சம் எழுந்துள்ளது.
சில ஆராய்ச்சியாளர்கள் இந்த நிகழ்வை 'காட்ஸில்லா எல் நினோ' அல்லது 'சூப்பர் எல் நினோ' என்று குறிப்பிடுகின்றனர். 2026 இறுதிவரை இது தொடர்ந்து வலுப்பெறும் என்று கணிப்புகள் தெரிவிக்கின்றன.
அமெரிக்காவின் தேசிய கடல் மற்றும் வளிமண்டல நிர்வாகத்தின் (NOAA) காலநிலை கணிப்பு மையம் வெளியிட்ட மதிப்பீட்டின்படி, அக்டோபர் முதல் டிசம்பர் 2026 வரை இந்த எல் நினோ "மிகவும் வலுவான" நிலையை அடைய 81% வாய்ப்பு உள்ளது. இது, நம்பகமான பதிவுகள் தொடங்கிய காலத்திலிருந்து ஏற்பட்ட சக்திவாய்ந்த எல் நினோ நிகழ்வுகளில் ஒன்றாக இருக்கலாம் என்று கூறப்பட்டுள்ளது.
சில காலநிலை மாதிரிகள், 1982-83, 1997-98 மற்றும் 2015-16 ஆண்டுகளில் பதிவான வரலாற்று சிறப்புமிக்க எல் நினோ நிகழ்வுகளையும் இது மிஞ்சக்கூடும் எனக் காட்டுகின்றன.
1,000 ஆண்டுகளில் இல்லாத அளவுக்கு வலிமையானதா?
சில வானிலை ஆய்வாளர்கள், இது கடந்த 1,000 ஆண்டுகளில் இல்லாத அளவுக்கு வலிமையான எல் நினோவாக இருக்கலாம் என்று கூறுகின்றனர். ஆனால், இந்தக் கூற்றுக்கு தற்போது உறுதியான ஆதாரம் இல்லை என்று விஞ்ஞானிகள் விளக்குகின்றனர்.
ஏனெனில், நேரடி வானிலை பதிவுகள் சுமார் 150 ஆண்டுகள் மட்டுமே உள்ளன. அதற்கு முந்தைய காலநிலையை மர வளையங்கள், பனிப்படலங்கள் மற்றும் பிற பழங்கால காலநிலை ஆதாரங்களின் அடிப்படையில் மட்டுமே ஆய்வு செய்கிறார்கள்.
2027 உலகின் மிக வெப்பமான ஆண்டாக மாறுமா?
எல் நினோ என்பது, பசிபிக் பெருங்கடலின் மத்திய மற்றும் கிழக்குப் பகுதிகளில் கடல் மேற்பரப்பு வெப்பநிலை இயல்பை விட அதிகரிக்கும் இயற்கையான காலநிலை நிகழ்வாகும். இது உலகம் முழுவதும் வானிலை அமைப்புகளை மாற்றுகிறது.
இந்த முறை எல் நினோ மிகவும் வலுப்பெற்றால், ஏற்கனவே பசுங்குடில் வாயுக்களால் அதிகரித்துள்ள உலக வெப்பமயமாதலுடன் இணைந்து 2027 ஆம் ஆண்டு இதுவரை பதிவானவற்றில் மிக அதிக வெப்பமான ஆண்டாக மாறக்கூடும் என்று விஞ்ஞானிகள் எச்சரிக்கின்றனர்.
பொதுவாக, எல் நினோ உச்சத்தை எட்டிய சில மாதங்களுக்குப் பிறகே உலக வெப்பநிலையும் அதிகபட்சத்தை அடையும் என்று அவர்கள் கூறுகின்றனர்.
இந்தியாவில் வலுவான எல் நினோ ஏற்பட்டால்:
வழக்கத்தை விட அதிக வெப்பநிலை பதிவாகலாம்.
வெப்ப அலைகள் அடிக்கடி ஏற்படலாம்.
தென்மேற்கு பருவமழை பாதிக்கப்படும் வாய்ப்பு அதிகரிக்கலாம்.
இருப்பினும், மழைப்பொழிவின் அளவு இந்தியப் பெருங்கடல் இருதுருவ நிகழ்வு (Indian Ocean Dipole) உள்ளிட்ட பிற காலநிலை காரணிகளையும் பொறுத்தே அமையும்.
நாடுகள் தயாராக இருக்க வேண்டும்
ஐக்கிய நாடுகள் சபை, வலுப்பெறும் எல் நினோ "ஏற்கனவே வெப்பமடைந்துள்ள பூமியின் நிலையை மேலும் மோசமாக்குகிறது" என்று எச்சரித்துள்ளது. இதனால் ஏற்படக்கூடிய காலநிலை பாதிப்புகளை சமாளிக்க, முன்கூட்டிய எச்சரிக்கை அமைப்புகள் மற்றும் தகுந்த முன்னெச்சரிக்கை நடவடிக்கைகளை அரசுகள் வலுப்படுத்த வேண்டும் என்றும் வலியுறுத்தியுள்ளது.
