அமெரிக்க வர்த்தகப் பேச்சுவார்த்தையில் கனடா சலுகைகள் அளிப்பதைத் தவிர்க்க வேண்டும் - பால் பண்ணையாளர்கள் எச்சரிக்கை
அமெரிக்க அதிபர் டொனால்ட் டிரம்ப் (Donald Trump) விதித்துள்ள வரி கெடு தேதிக்கு முன் வர்த்தகப் பேச்சுவார்த்தை தீவிரமடைந்துள்ள நிலையில், தங்கள் துறையை உள்ளடக்கிய எந்தவொரு சலுகைகளுக்கும் உடன்படக் கூடாது என கனடா பால் பண்ணையாளர்கள் எச்சரித்துள்ளனர்.
ஆகஸ்ட் 19 முதல் கனடா பொருட்கள் மீது புதிய 50 சதவீத வரிகள் அமலுக்கு வரவுள்ளன. இதற்கு முன்பு கனடா வழங்கிய பல்வேறு சலுகைகளுக்குப் பிறகும் அமெரிக்கா புதிய கோரிக்கைகளை முன்வைத்து வருவதால், மேலும் சலுகைகளை வழங்குவது பயனளிக்காது என்றும், "எங்கள் உணவு இறையாண்மை விற்பனைக்கு அல்ல" என்றும் கனடா பால் பண்ணையாளர்கள் சங்கம் (Dairy Farmers of Canada) தெரிவித்துள்ளது.
கனடாவின் பால் பண்ணைத் துறையைப் பாதுகாக்கும் கட்டுப்பாட்டு முறைமையை (Supply Management) அமெரிக்கா தொடர்ந்து எதிர்த்து வருகிறது. பிரதமர் மார்க் கார்னி (Mark Carney), இந்த முறைமைக்குத் தனது அரசு உறுதுணையாக இருக்கும் எனத் தெரிவித்துள்ளார்.
பால் துறை தவிர, "Buy Canadian" கொள்முதல் கொள்கை, அமெரிக்க வாகனங்களுக்கான வரம்புகள் மற்றும் மாகாண அளவில் அமெரிக்க மதுபான விற்பனைக்கு விதிக்கப்பட்டுள்ள தடைகளை நீக்கக் கோரியும் அமெரிக்கப் பிரதிநிதிகள் அழுத்தம் கொடுத்து வருகின்றனர்.
டிரம்பின் வரிகளுக்குப் பதிலடியாகப் பல கனடிய மாகாணங்கள் அமெரிக்க மதுபானங்களை விற்பனையிலிருந்து விலக்கின. நியாயமான ஒப்பந்தம் எட்டப்படும் வரை அமெரிக்க மதுபானங்கள் திரும்ப வராது என கியூபெக் (Quebec) அரசு உறுதியாகத் தெரிவித்துள்ளது.
கனடா-அமெரிக்க வர்த்தக அமைச்சர் டொமினிக் லெப்லாங்க் (Dominic LeBlanc) மற்றும் தலைமை வர்த்தகப் பேச்சுவார்த்தையாளர் ஜேனிஸ் சாரெட் (Janice Charette) ஆகியோர் வாஷிங்டனில் பேச்சுவார்த்தைகளைத் தொடர்ந்து நடத்தி வருகின்றனர்.
