கொசோவோ நாடாளுமன்றத்தில் பரபரப்பு: பிரதமர் மீது முட்டைகளை வீசி தாக்குதல்.!
தென்கிழக்கு ஐரோப்பிய நாடான கொசோவோவின் நாடாளுமன்றத்தில், பிரதமர் அல்பின் குர்தி (Albin Kurti) மீது எதிர்க்கட்சியைச் சேர்ந்த பெண் நாடாளுமன்ற உறுப்பினர் டைம் கத்ரிஜா (Time Kadrijah) முட்டைகளை வீசி தாக்குதல் நடத்திய சம்பவம் பரபரப்பை ஏற்படுத்தியுள்ளது.
நாடாளுமன்ற அமர்வில் நடந்துகொண்டிருந்தபோது, பிரதமர் அல்பின் குர்தி அமர்ந்திருந்த இருக்கையை நோக்கி வந்த எதிர்க்கட்சி நாடாளுமன்ற உறுப்பினர் டைம் கத்ரிஜா, பிரதமர் மீது திடீரென முட்டைகளைச் சரமாரியாக வீசினார்.
பாதுகாப்புப் படையினரும் சக நாடாளுமன்ற உறுப்பினர்களும் அவரைத் தடுத்து நிறுத்தினர். பாதுகாப்புப் படையினர் பிரதமரை உடனடியாகச் சூழ்ந்து பாதுகாப்பு அளித்தனர்.
கடந்த ஜூன் மாதம் நடைபெற்ற தேர்தலில் அல்பின் குர்தியின் கட்சி 120 இடங்களில் 53 இடங்களைப் பெற்றது.
இந்த நிலையில் அல்பின் குர்தி இடைக்கால பிரதமராகப் பொறுப்பேற்றார்.
தற்போது பதில் ஜனாதிபதியாக அல்புலேனா ஹக்ஷியு (Albulena Haxhiu) பதவியிலிருக்கும் நிலையில் புதிய ஜனாதிபதியைத் தேர்ந்தெடுப்பதற்கான ஒப்பந்தத்தை எட்ட கூடுதல் அவகாசம் வழங்குமாறு நாடாளுமன்ற உறுப்பினர்களிடம் அல்பின் குர்தி கோரிக்கை விடுத்தபோது இந்தச் சம்பவம் நிகழ்ந்துள்ளமை குறிப்பிடத்தக்கது.
